ಕೋಯಿಕ್ಕೋಡ್ (ಕೇರಳ): ದೇವರ ನಾಡು ಕೇರಳ ರಾಜ್ಯದ ಮಲಪ್ಪುರಂ ಜಿಲ್ಲೆಯ ಪರಪ್ಪನಂಗಡಿ ಮುನ್ಸಿಪಾಲ್ಟಿ ಪ್ರದೇಶದಲ್ಲಿ ಇರುವ ‘ಹರಿತ ಕರ್ಮ ಸೇನೆ’ ಎಂಬ ಸ್ವಸಹಾಯ ಸಂಘದ ಮಹಿಳೆಯರು ಇದೀಗ ಭಾರೀ ಸುದ್ದಿಯಲ್ಲಿದ್ದಾರೆ. ಈ ಸಂಘ 11 ಮಹಿಳೆಯರಿಗೆ ಬಂಪರ್ ಲಾಟರಿ ಹೊಡೆದಿದೆ. ಕೇರಳ ರಾಜ್ಯದ ಮಾನ್ಸೂನ್ ಬಂಪರ್ ಲಾಟರಿಯಲ್ಲಿ ಮೊದಲ ಬಹುಮಾನ ಈ ಮಹಿಳೆಯರಿಗೆ ಸಿಕ್ಕಿದೆ. ಬರೋಬ್ಬರಿ 10 ಕೋಟಿ ರೂ. ಬಹುಮಾನವನ್ನು ಈ ಮಹಿಳೆಯರು ಬಾಚಿಕೊಂಡಿದ್ದಾರೆ.
ಬಂಪರ್ ಲಾಟರಿಯ ಟಿಕೆಟ್ ಮೊತ್ತ 250 ರೂ. ನಿಗದಿಯಾಗಿತ್ತು. ಸಂಘದ 9 ಮಹಿಳೆಯರು ತಲಾ 25 ರೂ. ಹಣ ಹಾಕಿದ್ದರು. ಇನ್ನು ಇಬ್ಬರು ಮಹಿಳೆಯರು ತಲಾ ಹನ್ನೆರಡೂವರೆ ರೂಪಾಯಿ ಕೊಟ್ಟಿದ್ದರು. ಈ ಮಹಿಳೆಯರು ಮಲಪ್ಪುರಂ ಜಿಲ್ಲೆಯಲ್ಲಿ ಪೌರ ಕಾರ್ಮಿಕರಾಗಿದ್ದು, ಮನೆ ಮನೆಗಳಿಂದ ಕಸ ಸಂಗ್ರಹಿಸುವ ಕೆಲಸ ಮಾಡುತ್ತಾರೆ. ಕಳೆದ ಎರಡೂವರೆ ವರ್ಷಗಳಿಂದ ಈ ವೃತ್ತಿ ಮಾಡುತ್ತಿದ್ದ ಈ ಮಹಿಳೆಯರು ಇದೀಗ ಕೋಟ್ಯಧೀಶರಾಗಿದ್ದಾರೆ. ಮುನ್ಸಿಪಾಲ್ಟಿಯಲ್ಲಿ ಒಟ್ಟು 57 ಮಹಿಳಾ ಸದಸ್ಯರು ‘ಹರಿತ ಕರ್ಮ ಸೇನೆ’ ಸದಸ್ಯರಾಗಿದ್ದಾರೆ. ಈ ಪೈಕಿ 11 ಮಹಿಳೆಯರು ಲಾಟರಿ ಟಿಕೆಟ್ ಖರೀದಿಸಿದ್ದರು. ಇದೀಗ ಲಾಟರಿಯಲ್ಲಿ ಬಂಪರ್ ಬಹುಮಾನ ಬಂದಿದ್ದರೂ ಕೂಡಾ ಎಲ್ಲರೂ ಒಟ್ಟಾಗಿ ತಮ್ಮ ಕೆಲಸ ಮುಂದುವರೆಸಲು ಮಹಿಳೆಯರು ನಿರ್ಧರಿಸಿದ್ದಾರೆ.
ಈ ಮಹಿಳೆಯರು ಹಣ ಒಟ್ಟುಗೂಡಿಸಿ ನಾಲ್ಕನೇ ಬಾರಿ ಲಾಟರಿ ಟಿಕೆಟ್ ಖರೀದಿ ಮಾಡಿದ್ದರಂತೆ. ತಮಗೆ ಲಾಟರಿ ಬಹುಮಾನ ಸಿಗಬಹುದು ಎಂದು ಈ ಮಹಿಳೆಯರು ಎಂದಿಗೂ ಭಾವಿಸಿರಲಿಲ್ಲವಂತೆ. ಪಾಲಕ್ಕಾಡ್‌ ಜಿಲ್ಲೆಯ ಏಜೆನ್ಸಿಯೊಂದು ಈ ಲಾಟರಿ ಟಿಕೆಟ್ ಮಾರಾಟ ಮಾಡಿತ್ತು. ಲಾಟರಿ ಖರೀದಿಸಿದಾಗ ಈ ಮಹಿಳೆಯರು ಹಣ ನಷ್ಟವಾಯ್ತು ಎಂದು ಭಾವಿಸಿದ್ದರಂತೆ. ಕೆಲಸ ಮುಗಿಸಿ ಮನೆಗೆ ಬಂದ ಬಳಿಕ ಲಾಟರಿ ಖರೀದಿಸಿದ ಮಹಿಳೆಯರ ಪೈಕಿ ಪಾರ್ವತಿ ಎಂಬುವರ ಮಗ ನಿಮಗೆ ಲಾಟರಿ ಬಹುಮಾನ ಬಂದಿದೆ ಎಂದು ಹೇಳಿದರಂತೆ. ಇದೀಗ ಲಾಟರಿಯಲ್ಲಿ ಬಹುಮಾನ ಗಳಿಸಿರುವ ಮಹಿಳೆಯರೆಲ್ಲರೂ ಮನೆಗಳನ್ನು ಕಟ್ಟಿಕೊಳ್ಳಲು ನಿರ್ಧರಿಸಿದ್ದಾರೆ. ಮಕ್ಕಳ ಶಿಕ್ಷಣಕ್ಕೆ ಹಣ ಎತ್ತಿಡುತ್ತೇವೆ, ಸಾಲ ತೀರಿಸುತ್ತೇವೆ ಎಂದು ಮಹಿಳೆಯರು ಹೇಳಿದ್ದಾರೆ. 11 ಮಹಿಳೆಯರ ಪೈಕಿ ಇಬ್ಬರು 25 ರೂ. ಬದಲು ತಲಾ ಹನ್ನೆರಡೂವರೆ ರೂ ಹಣ ನೀಡಿದ್ದರು. ಇವರಿಗೆ ಲಾಟರಿಯ ಹಂಚಿಕೆಯಲ್ಲಿ ಅರ್ಧ ಹಣ ಮಾತ್ರ ಸಿಗುತ್ತದೆ. ಸಾಕಷ್ಟು ಸಾಲ ಮಾಡಿಕೊಂಡಿರುವ ಈ ಮಹಿಳೆಯರು ಕೆಲಸಕ್ಕೆ ಬಸ್‌ನಲ್ಲಿ ಹೋಗಲು ಹಣವಿಲ್ಲದೆ ನಡೆದುಕೊಂಡೇ ಮುನ್ಸಿಪಾಲಿಟಿಗೆ ಹೋಗುತ್ತಿದ್ದರಂತೆ. ಇದೀಗ ಈ ಮಹಿಳೆಯರು ತಮ್ಮ ಲಾಟರಿ ಟಿಕೆಟ್ ಅನ್ನು ಪರಪ್ಪನಂಗಡಿ ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಬ್ರಾಂಚ್‌ಗೆ ಜಮೆ ಮಾಡಿದ್ದಾರೆ. ಹಣಕಾಸಿನ ತೀವ್ರ ಮುಗ್ಗಟ್ಟು ಎದುರಿಸುತ್ತಿದ್ದ ಈ ಮಹಿಳೆಯರಿಗೆ ಲಾಟರಿ ಹಣ ಸಿಕ್ಕಿರೋದು ತುಂಬಾನೇ ಅನುಕೂಲ ಆಗಲಿದೆ ಅಂತಾ ಮುನ್ಸಿಪಾಲ್ಟಿ ಅಧ್ಯಕ್ಷ ಉಸ್ಮಾನ್ ಅವರು ಸಂತಸ ವ್ಯಕ್ತಪಡಿಸಿದ್ದಾರೆ.
